郁郁貢的爆牙

暴走爆牙（二十八）－捷克山桑子樹林最終篇

joke_k_d — Wed, 17 Jun 2009 04:52:14 +0800

其實好唔想寫呢篇，因為恐怕會挖開剛結成嘅痂，不過.... 仍然覺得要為生命中呢個段落劃上句號.....

(閱讀全文)

短裝

joke_k_d — Tue, 16 Jun 2009 22:35:57 +0800

其實一路都有幫狗狗貼肉剪短肚毛，手、腳、側邊同胸前就夏天時剪短少少。不過自從搵到間溝通到又信得過嘅狗酒店之後，為咗方便 P 哥哥照顧打理，我再整體地剪短啲～之但係冇剪到游水裝咁短囉......

雖然剪北京狗毛剪咗唔少次，不過技術依然係好差，仍然勁 "湯碗 feel"..... 好彩狗狗信我話佢靚靚，真係識得屙督尿照吓就知我呃佢，呵呵～

Hey.... Hay Fever

joke_k_d — Sat, 06 Jun 2009 00:30:02 +0800

近日經常面腫、眼腫、鼻腫....（加上身材似隻糉，呵呵～）並非繼續哭哭啼啼，而係季節性病態。唔知真正幾時自己開始顯現花粉熱症徵狀，不過應該係近三年嘅事。上年五月臨出發去西班牙旅行前，亦有流鼻水、眼痕嘅問題，到旅途中後段先冇再受困擾。今年顯然比較嚴重：四十幾歲人來從未打過咁多乞嚏、包咁多「雲吞」、鼻塞到咁多晚瞓唔到......

其實市面上有唔少非處方抗組胺藥（antihistamine）選擇，但係我寧願繼續捱落去至季尾都唔買。原因有四：

抗組胺藥其實只係阻止免疫系統發出嘅組織胺到達（如至鼻腔），治標不治本！
同一抗組胺藥不能長期使用（如三個月以上），因為免疫系統會「適應」
自從燒賣發病後，對所有壓止、影響免疫系統嘅藥物都好抗拒
以前用過抗組胺藥（會導致眼瞓），引發過不尋常副作用：confusion, nervousness 同 irritability。仲記得嗰次晌公司食咗藥勁唔妥，冇眼瞓，但係見到同事行過、聽到聲音、見到電腦 mon 上嘅字都唔舒服唔順眼好煩，要伏晌枱面用件風褸衿住個頭..... 之後都係覺得要走，於是諗住去阿媽屋企，一定有人，搭的士個司機過咗東隧後唔識路問我，我竟然 confused 到話我都唔知點去到..... 咁個司機終於 call 台問路。

其實我嘅徵狀時好時壞，但係未至於呼吸唔到或似哮喘，最最慘係鼻塞到瞓唔到，好彩並非晚晚都係咁。尋日得 blog 友指點：開始試下瑜珈鹽水淨鼻術，睇下對我嘅鼻塞有冇作用先.....

哭

joke_k_d — Wed, 27 May 2009 23:44:08 +0800

唔相信自己已經完全豁然放開，不過默默流淚嘅時間大大減少。日常生活中實在有太多事物惹我傷心，每每眼淚將要湧出時就會吸啖氣忍住...... 經常晌街邊喊苦喊忽會嚇親街坊途人哩～

我覺得自己年紀愈大愈容易喊，亦愈不遮掩自己嘅情緒，可能唔再工作嘅緣故，唔需要太過顧慮影響身邊嘅其他人。不過..... 平常嘅我，過一般淡如開水嘅日子，根本好少大喜大悲～

喊對於現在嘅我，並冇宣洩哀愁嘅功用，大喊之後亦只會鼻塞疲累，圍住心頭嘅痛楚不會減褪......

我只有等.......等時間去慢慢一點一滴沖擦記憶～

p.s. 各位好朋友，一次過多謝你哋嘅關愛同留言，我唔逐一回覆嘞～

此情不再～

joke_k_d — Thu, 14 May 2009 06:16:37 +0800

親愛嘅燒賣已經晌四月廿五日離開咗....... 病因係 IMHA （請自行去 google 一下，我唔想詳述）。我以為自己心情已經平復好多，但係其實心仍然非常痛，淚仍然默默流...... 一方面唔想繼續影晌老公同麻煩嘅情緒，但係亦冇法令自己真正釋懷.......

Mel R 去了～

joke_k_d — Wed, 08 Oct 2008 15:13:38 +0800

好傷心........ 喊到眼腫咗～
尋晚抱往燒賣晌門口裝吓睇下老公返到未，撞啱鄰居同佢個女 Lucie 出街，佢用捷文 + 德文 + 有限英文話我知 Mel R 晌附近俾車撞到，去咗彩虹橋～當時唔識即刻反應，只係噢咗一聲...... 應該係唔相信係事實！冇耐老公返到又咁啱鄰居返屋企，再講多一次個壞消息，我至識感覺到好心痛好心痛，坐晌地下不停流淚...... 我哋前晚晌馬德里返嚟佢仲第一時間歡迎我哋....... 尋朝老公返工前佢都有揩佢寃佢........ 可惜我尋日掛住攪清潔同陪伴由 dog hotel 返嚟嘅麻煩 & 燒賣，全日冇緣見到 Mel R～